Huelga feminista
Imaxes: o feminismo para Galiza

Milleiros de mulleres convocadas polo movemento feminista tomaron durante a folga feminista do 8 de marzo as rúas de Galiza. Por volta das 20:00 comezaron a sair as distintas manifestacións que, no caso de Compostela, Vigo e A Coruña, desbordaron as previsións. O relato de moitas das activistas que acudiron coincide en salientar a sensación de desborde nas grandes cidades e as dificuldades que toparon as marchas en arrancar polo enorme número de persoas presentes.

Cómpre salientar que a manifestación na Coruña alterou o seu percorrido de sempre, pois avanzou desde o Obelisco ata a antiga Fábrica de Tabacos en homenaxe ás mulleres cigarreiras, que durante o século XIX foron por décadas o maior colectivo obreiro de Galiza. En 1857, había case 4 mil traballadoras cigarreiras, un 7 de decembro amotináronse como protesta polas malas condicións laborais: subiron ao tellado da fábrica, romperon as máquinas e tiráronas ao mar xunto co tabaco. Deste xeito o feminismo coruñés quixo lembralas e reivindicar os séculos de loita polos dereitos de todas as mulleres e pola igualdade real e efectiva.

En Ourense tamén sairon por milleiros, nunha convocatoria que partía da Subdegelación do Goberno ata a Praza Maior da cidade de As Burgas, onde as mensaxes reivindicativas misturábanse cos tambores que tocaban mulleres de toda idade.

Mentres tanto Lugo, que foi a cidade que serviu de punto de encontro do feminismo galego durante o pasado 3 de marzo, volveu ser testemuña da forza dun movemento que congregou en torno a 10.000 persoas. A ruada nocturna lucense saíu ás 20:00 horas da explanada do edificio da Xunta de Galicia e desembocou na Praza de Santa María.

MOBILIZACIÓNS máis alá das cidades

O movemento feminista galego convocou mobilizacións por todo o país baixo o lema: "Por todas as mulleres, por todos os dereitos: revolta feminista!" e abofé que así foi. Máis de 50 convocatorias nas principais vilas, dende Burela ata O Barco ou Viana do Bolo, pasando por Vimianzo, Cuntins, Lalín, Melide, Ames ou Carballo xa camiño a costa, ben sexa a Cee e Cedeira ou cara Rianxo, Redondela, Cangas e Bueu.

Deste xeito, tamén A Mariña viviu concentracións pola mañá en Ortigueira, Viveiro ou Ribadeo. Pola tarde, buses e coches partiron do Vicedo, Viveiro, San Cibrao, Ribadeo ou Trabada con destino a Burela. O feminismo da Mariña saíu dende a estación de tren de Burela e desembocou na praza do Concello a ritmo de batukada.

Por outra banda, ao longo do día houbo diversas mobilizacións tanto en Chantada como en Monforte, onde segundo datos da policía local, xuntáronse case un millar de persoas na concentración das 20 da tarde convocada por Galegas 8M, onde un dos berros máis escoitados foi: "Queremos emprego, traballo xa temos!"

TREBOADAS EN COMPOSTELA

Milleiros de mulleres, convocadas por Galegas8M, tomaron as rúas de Compostela durante a mañá da folga feminista. Os primeiros piquetes informativos comenzaron a percorrer o centro da cidade a partir das nove da mañá.

Ademáis de tentar garantir o direito á folga das traballadoras, foron sinalando distintos establecementos “especialmente culpábeis da opresión das mulleres”: centros de estética e coñecidas tendas de roupa entre outros.

A partir das 11:30 horas comezáronse a dar cita distintos grupos de activistas nas chamadas “treboadas feministas”.

Desde catro puntos distintos da cidade (Campus Sur, Galuresa, Concheiros e San Caetano) partiron en manifestación até confluiren, pasadas as doce do medio día, na praza de Galiza e na rúa da Senra.

“Hoxe imos comer na rúa, imos ficar e non nos imos mover”, anunciaron as activistas con altofalantes

Milleiros de mulleres xuntáronse no centro de Compostela superando todas as previsións, nunha mobilización ainda máis numerosa da do ano 2018.Perto das 13:00 horas unha portavoz das activistas anunciou a través dun altofalante a intención de ficar ocupando as rúas e chamando a “comer na rúa e permanecer ao longo de todo o día”.

Pola tarde un numeroso piquete feminista percorreu distintas tendas de coñetidas marcas de roupa sinalando o papel destas multinacionais na “explotación das mulleres e na súa cousificación”.